डडेल्धुरा — डडेल्धुरामा मलामी गएका एक वृद्धको महाकाली नदीमा डुबेर मृत्यु भएको छ। मृत्यु हुनेमा परशुराम नगरपालिका–९ का ६० वर्षीय इन्द्रबहादुर बोहरा रहेका छन्।
जिल्ला प्रहरी कार्यालय डडेल्धुराका अनुसार बोहरा परशुराम नगरपालिका–५ परिगाउँमा मलामी गएका थिए। सोही क्रममा शुक्रबार बिहान करिब ११:१५ बजे महाकाली नदीमा नुहाउन पसेका बोहरा अचानक डुबेर बेपत्ता भएका थिए।
घटनापछि इलाका प्रहरी कार्यालय जोगबुढाबाट खटिएको प्रहरी टोलीले खोजतलास सुरु गरेको थियो। खोजीका क्रममा उनी सोही दिन दिउँसो १२:१० बजे परशुराम नगरपालिका–६ कुडा क्षेत्रमा महाकाली नदी किनारमा मृत अवस्थामा फेला परेका प्रहरीले जनाएको छ।
घटनाबारे थप अनुसन्धान भइरहेको जिल्ला प्रहरी कार्यालय डडेल्धुराले जानकारी दिएको छ।
